В строительной бригаде СПК «Маяк-Заполье» работают настоящие профессионалы своего дела

Будаўнік — самая мірная прафесія на зямлі. Людзі гэтай прафесіі, мабыць, як ніхто іншы, умеюць дарыць радасць. Незабыўныя хвіліны шчасця з нагоды доўгачаканага наваселля, узвядзення  новых школ і дзіцячых садкоў, медыцынскіх устаноў, добраўпарадкаваных гарадскіх мікрараёнаў і аб’ектаў сацкультбыту, хай і невялікіх, але такіх неабходных для камфортнага жыцця вяскоўцаў. Карэспандэнт газеты “Полымя” накіравалася ў СВК “Маяк-Заполле” і сустрэлася з работнікамі  будаўнічай брыгады  гаспадаркі.

На працягу многіх гадоў у гаспадарцы неадкладныя гаспадарчыя работы выконваюцца сіламі ўласнай будаўнічай брыгады. У кожнага з чатырнаццаці яе работнікаў багаты вопыт. За якую б справу ні ўзяліся, выканаюць яе старанна і якасна. Задаволены працай калег прараб сельгаспрадпрыемства Сяргей Шчэмер, які  ўжо 41 год шчыруе на красненскай зямлі.

– Шмат  гадоў наш калектыў нязменны, – расказвае Сяргей Іванавіч. – Падабраліся людзі, якія з адказнасцю ставяцца да любога даручэння. Хоць і не ўсе маюць адпаведныя будаўнічыя спецыяльнасці, але не горш іншага прафесійнага сталяра, плітачніка  або тынкоўшчыка спрацуюць. Мы зрабілі стаўку на вопытных спецыялістаў, якія не гоняцца за доўгім рублём, а  цэняць свой аўтарытэт. Ім тут жыць, працаваць далей, сустракацца з людзьмі, таму лепш не халтурыць.

Папрасіла назваць найважнейшыя работы, якія мясцовыя будаўнікі выканалі сёлета. Вялікі спіс атрымаўся, і важнае месца ў ім  адведзена работам на новым  малочнатаварным комплексе “Востухава”.  Адзін з асноўных штогадовых заняткаў — нарыхтоўка дроў. За год для  ацяплення будынкаў, нагрэву вады на жывёлагадоўчых фермах, іншых патрэб у гаспадарцы выкарыстоўваецца больш за  400 кубаметраў дроў. Часта даводзіцца працаваць на аб’ектах жывёлагадоўлі гаспадаркі, рамантуюць шыферныя дахі пабудоў сельгаспрадпрыемства. Гаспадарка выдзяляе сродкі на набыццё матэрыялаў для чарговага аб’ёму работ: цвікоў, шыферу, металічных вугалкоў, пліткі, цэменту, клеявых раствораў.  Бензапілу ўсе, хто з ёй працуе, імкнуцца ўтрымліваць у пастаяннай гатоўнасці.

Разам з намеснікам старшыні па ідэалагічнай рабоце  сельгаспрадпрыемства Вольгай Грыгаровіч кірунак трымаю на МТФ “Востухава”, дзе працуюць мясцовыя будаўнікі.  Цёплымі словамі характарызуе Вольга Яўгеньеўна кожнага з членаў звяна брыгады.

– Тут  працуе будаўнічая дынастыя сям’і Чужаўка. Агульны стаж работы братоў Віктара і Аляксандра разам з сынам і пляменнікам Арцёмам складае больш васьмідзесяці гадоў. Працоўныя дынастыі – апора і гонар любога прадпрыемства. Тое, што людзі шчыруюць сем’ямі, сведчыць аб аўтарытэце вытворчасці, яго стабільнасці і надзейнасці. Лёсы нашых герояў – выдатнае пацвярджэнне таму, што вельмі важна быць адданым сваёй справе. Аляксандр Чужаўка – гонар нашага сельгаспрадпрыемства. Ён  з году ў год абараняе годнасць гаспадаркі на раённых спаборніцтвах  па гіравым спорце,   неаднаразова быў пераможцам нават рэспубліканскіх спаборніцтваў. Па-майстэрску валодаюць будаўнічым арсеналам справы  Сяргей Напорка і Міхаіл Самец: і тынкавыя работы выканаюць, і плітку пакладуць.

Будаўнікі  не хаваюць, што да сваіх аб’ектаў ставяцца амаль як да дзяцей. Калі ўсё здадзена,  то працаўнікі заўсёды хвалююцца і перажываюць за вынік. А калі пабудаванае іх рукамі  ўжо пачынае жыць сваім жыццём –  ганарацца і, кожны раз,  праязджаючы міма, пазіраюць  і  міжвольна ў галаве ўзнікаюць думкі: “Як ён там? Ці ўсё добра?” Вось так асабістае адказнае стаўленне да даручанай справы кожнага члена брыгады і аднадушная адказнасць  дазваляюць  калектыву паспяхова спраўляцца з разнастайнымі заданнямі.

Кацярына КУКАНАВА

Фота аўтара