Первый в районе. В Кореличском загсе прошла торжественная регистрация ребёнка

Правядзенне такіх цырымоній стала ўжо традыцыйным, і кожная з іх праходзіць вельмі трапятліва і цёпла. Як вядома, сапраўднае сямейнае шчасце поўнае толькі тады, калі ў доме гучаць дзіцячыя галасы. Гэта меркаванне цалкам падзяляюць у сям’і  Юрыя і Яўгеніі Каралько з г.п. Карэлічы. 8 студзеня  іх ячэйка грамадства папоўнілася  дачушкай. Нараджэнне немаўляці  заўсёды напаўняе жыццё сям’і асаблівым святлом і падпарадкоўвае  жыццё  новым рытмам і правілам. І першае, што робяць бацькі – гэта даюць дзіцяці імя.  Адэліна. Так  назвалі маладыя бацькі сваю дзяўчынку. Імя абяцае шмат добрых якасцяў,  гэта ў сваёй большасці няўрымслівыя і высакародныя людзі.

Са шчырымі пажаданнямі да бацькоў звярнулася начальнік аддзела ЗАГС Валянціна Сіўко:

– Дзень рэгістрацыі нараджэння з’яўляецца не толькі асаблівым, але і важным. У гэты момант у чалавека з’яўляецца першы ў яго жыцці дзяржаўны дакумент – пасведчанне аб нараджэнні,  дзіця становіцца афіцыйна грамадзянінам сваёй краіны.  Хай тая любоў, якую вы будзеце ўсёй сям’ёй дарыць Адэніне зараз, з гадамі будзе аддавацца любоўю ў адказ і клопатам пра вас, – звярнулася да шчаслівых бацькоў  Валянціна Міхайлаўна і з цёплымі словамі пажаданняў дабра і шчасця ўручыла пасведчанне аб нараджэнні.

Раздзяліць радасць сям’і Каралько прыйшлі калегі па працы,   бацькі Юрыя, супрацоўнікі Карэліцкага РАНС. Самыя шчырыя пажаданні гучалі ў гэты дзень і ад  прадстаўнікоў Карэліцкай раённай арганізацыі ГА ”Беларускі саюз жанчын”,  і ад дырэктара Цэнтра сацыяльнага абслугоўвання насельніцтва Карэліцкага раёна Інэсы Сямібратавай.  Акрамя прыгожых і цёплых слоў віншавання,  госці ўручылі бацькам кветкі і падарункавы сертыфікат,  і, безумоўна,   гасцінцы для маленькай карэліччанкі.

Выратавальнік Карэліцкага РАНС Юрый Каралько  і прадавец магазіна  “Белтавіс” Яўгенія  стварылі сям’ю ў 2018 годзе.  Маладыя бацькі  сур’ёзна ставяцца да сямейных каштоўнасцяў,  бо гэта найважнейшы падмурак, на якім будуецца жыццё любога чалавека. Абодва лічаць, што фарміраванне асобы пачынаецца менавіта ў сям’і. Дзецям неабходна на ўласным прыкладзе паказваць, як важна сям’я, тлумачыць, чаму неабходна шанаваць традыцыі.

Упэўнена, што прыемныя ўспаміны, якія пакінула ўрачыстасць, падрыхтаваная  супрацоўнікамі ЗАГСа для сям’і, застануцца з імі  на ўсё жыццё. А сямейны альбом   папоўніцца новымі фотаздымкамі, якія надоўга захаваюць гэтыя  шчаслівыя імгненні.

Хочацца ад усёй душы  і нам павіншаваць маладую сям’ю з нараджэннем самага вялікага шчасця. Мы шчыра жадаем моцнага здароўя і сямейнага дабрабыту. Хай праменьчык новага жыцця падорыць вам бязмерную любоў і цеплыню!

Кацярына КУКАНАВА

Фота аўтара